٣
١ باقڭز پدر بزه نه كونه محبت احسان ایتمشدر كه اللهك اولادی تسمیه اولنه‌لم بونڭ ایچون دنیا بزی طانیماز چونكه انی طانیمادی.٢ ای سوكیلولر شمدی اللهك اولادی ایز و نه اوله‌جغمز دها اظهار اولنمادی ایسه‌ده او اظهار اولندیغنده اڭا بكزر اوله‌جغمزی بیلورز زیرا انی همان اولدیغی كبی كوره‌جڭز.٣ و هر كیمك انده بویله امیدی وار ایسه انك پاك اولدیغی مثللو كندی نفسنی پاكلر٤ هر كیم كناه ایشلر ایسه شریعتی دخی تجاوز ایتمش اولور و كناه شریعتی تجاوز ایتمكدر٥ و بیلورسڭز كه او بزم كناهلرمزی رفع ایتمك ایچون اظهار اولندی و انده كناه یوقدر.٦ هر كیم انده قالورسه كناه ایشلمز. هر كناه ایشلیان كیمسه انی نه گورمش نه بیلمشدر٧ ای چوجوقلر سزی كیمسه آلداتماسون صلاح ایشلیان انك صالح اولدیغی مثللو صالحدر٨ كناه ایشلیان شیطاندندر زیرا شیطان ابتدادن برو كناه ایشلر. ابن الله بونڭ ایچون یعنی شیطانك ایشلرینی ابطال ایتمك ایچون اظهار اولندی٩ اللهدن هر طوغمش اولان كناه ایشلمز چونكه انك تخمی انده قالور و اللهدن طوغمش اولدیغی اجلدن كناه ایشلیه‌مز١٠ اللهك اولادی ایله شیطانك اولادی بو وجهله ظاهر اولور. صلاح ایشلمیان همدخی كندی برادرینی سومیان اللهدن دكلدر١١ زیرا ابتدادن ایشیتدیكڭز تنبیه بودركه بری بریمزی سوه‌لم١٢ شریردن اوله‌رق كندی قارنداشنی قتل ایدن قاین كبی اولمایه‌لم و انی نه سببدن قتل ایتدی. كندی عمللری كوتو و قارنداشنك عمللری صالح اولدیغی ایچون قتل ایتدی.١٣ ای برادرلرم دنیا سزه بغض ایدر ایسه تعجب ایتمیڭز١٤ اولومدن حیاته انتقال ایتدیكمزی برادرلری سودیكمزدن بیلورز برادرینی سومیان اولومده قالور١٥ كندی برادرینه هر بغض ایدن قاتلدر و هیچ بر قاتلك دروننده ابدی حیات بولنمادیغنی بیلورسڭز١٦ محبتی بوندن یعنی مسیح كندی جاننی یولمزه فدا ایتدیكندن بیلدك بزم دخی برادرلر یولنه جانلرمزی فدا ایتمه‌مز كركدر١٧ اما هر كیم دنیا مالنه مالك اولدیغی حالده برادرینك محتاج اولدیغنی كورورده شفقتنی اندن دریغ ایدر ایسه الله محبتی انده نصل قالور١٨ ای چوجوقلرم لفظاً یا لساناً دكل آنجق فعلاً و حقیقةً سوه‌لم.١٩ بونڭ ایله دخی حقیقتدن اولدیغمزی بیلورز و انك حضورنده قلبلرمزی تأمین ایدرز٢٠ زیرا اگر قلبلرمز بزی تعزیر ایدر ایسه الله قلبمزدن بیوك اولوب هر شیئه عالمدر٢١ ای سوكیلولر اگر قلبمز بزی تعزیر ایتمز ایسه اللهك حضورنده جساتمز وار٢٢ وهر نه دیلر ایسه‌ك اندن آلورز چونكه انك امرلرینی حفظ ایدرز و انك عندنده مقبول اولان شیلری ایشلرز٢٣ و انك امری بودر كه اوغلی عیسی المسیحك اسمنه اینانه‌لم و بزه امر ایتدیكی كبی بری بریمزی سوه‌لم٢٤ و انك امرلرینی حفظ ایدن انده او دخی بونده قالور و انك بزده قالدیغنی بوندن یعنی بزه ویردیكی روحدن بیلورز.