٤
١ ای سوكیلولر هر بر روحه اینانمایڭز لكن روحلر‌ك الله طرفندن اولوب اولمادیغی تجربه ایدڭز زیرا دنیاده چوق یالانجی پیغمبرلر چیقمشدر٢ اللهك روحنی بونكله بیلڭز عیسی المسیحك تنده گلمش ایدیكنی اقرار ایدن هر روح اللهدندر٣ و عیسی المسیحك تنده گلمش ایدیكنی اقرار ایتمیان هر روح اللهدن دكلدر و درجالك روحی بودر كه انك كله‌جكنی ایشیتدیڭز و الان بیله دنیاده‌در٤ ای چوجوقلر سز اللهدن‌سڭز و انلره غالب اولدیڭز زیرا سزده اولان دنیاده اولاندن بیوكدر٥ انلر دنیادندرلر بو سببدن دنیادن بحث ایدرلر دنیا دخی انلری دیكلر٦ بز اللهدن ایز اللهی بیلان بزی دیكلر اللهدن اولمایان بزی دیكله‌مز. حقیقت روحنی و ضلالت روحنی بوندن بیلورز.٧ ای سوكیلولر بری بریمزی سوه‌لم زیرا محبت اللهدندر و هر محبت ایدن اللهدن طوغمشدر و اللهی بیلور٨ محبت ایتمیان اللهی بیلمه‌مشدر زیرا الله محبتدر٩ اللهك بزه اولان محبتی بونكله یعنی اللهك كندی ابن وحیدینی انك واسطه‌سیله حیاته مالك اولمه‌مز ایچون دنیایه كوندرمسیله اظهار اولندی١٠ محبت بونده‌در دكل كه بز اللهی سودك آنجق او بزی سودی و كندی اوغلنی كناهلرمز ایچون كفارت اولمق اوزره كندردی١١ ای سوكیلولر الله بزی بویله سودی ایسه بزم دخی بری بریمزی سومه‌مز كركدر١٢ اللهی اصلا بر كیمسه كورمه‌مشدر. بری بریمزی سودیكمز تقدیرده الله بزده قالور و انك محبتی بزده كمال بولمش اولور١٣ انده قالدیغمزی وانك بزده قالدیغنی بونكله یعنی بزه كندی روحندن ویرمش اولدیغندن بیلورز١٤ و بز گوردك و شهادت ایدرز كه پدر اوغلی دنیانك خلاصكاری اولمق اوزره كوندردی١٥ هر كیم كه عیسانك ابن الله ایدیكنی اقرار ایدر ایسه الله انده او دی اللهده قالور١٦ بز دخی اللهك بزه اولان محبتنی بیلدك و ایناندق. الله محبتدر و محبتده قالان اللهده الله دخی انده قالور١٧ محبت بزده شونكله كمال بولمشدركه روز جزاده جسارتمز اوله زیرا او نصل ایسه بز دخی بو دنیاده بویله ایز١٨ محبتده قورقو یوقدر آنجق كامل محبت قورقویی دفع ایدر زیرا قورقوده عذاب وار و قورقان كیمسه محبتده كمال بولماشدر١٩ بز انی سورز چونكه اوّلا او بزی سودی٢٠ بر كیمسه اللهی سورم دیوبده كندی برادرینه بعض ایدر ایسه یالانجیدر زیرا كوردیكی برادرینی سومیان كیمسه كورمدیكی اللهی نصل سوه‌بیلور٢١ و انك طرفندن شو امرمز واردر كه اللهی سون كندی برادرینی دخی سوه.