١
١ عیسی المسیحك قولی و رسولی سمعون بطرس اللهمزك و خلاصكار عیسی المسیحك اظهار ایلدیكی صلاح واسطه‌سیله بزم ایله برابر همان اول قیمتلو ایمانه نائل اولانلره٢ سزه اللهی و ربمز عیسایی بیلمكله عنایت و سلامت چوغاله٣ مادامكه انڭ قدرت الهیه‌سی حیاته و تقوایه متعلق جمله شیلری بزی عزت و فضیلتله دعوت ایدنی بیلمكله بزه احسان ایلمش اولوب٤ انلر ایله دخی بزه غایت عظیم و قیمتلو وعدلر ویرلمشدر تا كه بونلرك واسطه‌سیله دنیاده شهوتدن نشأت ایدن فساددن قورتلمش اولوب طبیعت الهیه‌یه حصه‌دار اوله‌سڭز٥ سز دخی همان بو شیئه غیرت كامله كوستره‌رك ایمانكزه فضیلت و ضفیلته علم٦ و علمه ضبط نفس و ضبط نفسه صبر و صبره تقوی٧ و تقوایه قارنداش محبتی و قارنداش محبتنه محبت ضم ایدڭز٨ زیرا بو شیلر سزده بولنوب آرتدقجه سزی ربمز عیسی المسیحی بیلمك خصوصنده بوش و ثمره‌سز براقمازلر٩ لكن كیمده بو شیلر یوق‌ایسه اول كیمسه كور اولوب اوزاقدن كورمز و كندی اسكی كناهلرندن تطهیرینی اونوتمشدر١٠ بو اجلدن ای برادرلر دعوت و انتخابكزی ثابت قیلمغه دها زیاده جهد ایدڭز چونكه بونی یاپمغله اصلا دوشمیه‌جكسڭز١١ زیرا بو وجهله رب و خلاصكارمز عیسی المسیحك ابدی ملكوتنه كیرمڭز غنیلكله احسان اولنه‌جقدر.١٢ بو اجلدن اكرچه بو شیلری بیلوب حاضر بولنان حقیقتده ثابت اولمش ایسه كزده انلری دائما خاطركزه كتورمكی اهمال ایتمیه‌جكم١٣ و بن بو مسكنده قالدقجه سزی اخطار ایده‌رك اویاندرمغی لایق عدّ ایدرم١٤ زیرا بیلورمكه ربمز عیسی المسیحك بڭا بیان ایلدیكی كبی مسكنمی ترك ایتمكلكم یاقیندر١٥ ایمدی انتقالمدنصكره دائما بوشیلری در خاطر ایتمڭز ایچون جهد ایده‌جكم١٦ زیرا بز ساخته مصاللره تابع اولمش دكل آنجق ربمز عیسی المسیحك عظمتنی كوزلرمزله گورمش اوله‌رق انڭ قدرتنی و ظهورینی سزه بیلدردك١٧ زیرا جلال اعظم طرفندن بویله یعنی بنم سو كپلو اوغلم بودر بن اندن راضی ایم دیو بر صدا كلدیكنده پدر الله طرفندن عزت و جلال آلدی١٨ و سمادن گلان بو صدایی بز انڭ ایله برابر مقدّس طاغده بولندیغمز حالده ایشیتدك١٩ و بزده دها ثابت اولان پیغمبرلك كلامی واردر كه سز دخی كون آغاروب صباح یلدزی قلبلركزده طوغنجه‌یه‌دك قراڭلق یرده ضیادار چراغ كبی اڭا دقت ایلمكزله ایو ایدرسڭز٢٠ اوّلا بیلورسڭز كه كتابك هیچ بر پیغمبرلك كلامی تعبیر مخصوصدن اولماز٢١ زیرا هیچ بر وقت بر پیغمبرلك انسان ارادتیله كلمدی آنجق اللهك مقدّس ادملری روح القدس طرفندن تشویق اولنه‌رق سویله‌دیلر