١
١ اول ابتدادن موجود اولان اول ایشیتمش اول كوزلرمزله گورمش اولدیغمز اول مشاهده ایدوب اللرمزك لمس ایتدیكی حیات كلامنه دائر خبر ویررز٢ (و حیات اظهار اولندی بز دخی انی گوردك و شهادت ایده‌رك پدرڭ نزدنده بولنمش اولوب بزه اظهار اولنان اول ابدی حیاتی سزه اعلان ایدرز)٣ اول كوردیكمزی و ایشیتدیكمزی سزه اعلان ایدرز تا كه سزڭ دخی بزم ایله مشاركتڭز اولسون و بزم مشاركتمز دخی پدر ایله و اوغلی عیسی المسیح ایله‌در٤ و سزڭ مسرّتڭز مكمل اولمسی ایچون بونلری سزه یازارز٥ و اندن ایشیدوب سزه ویردیكمز خبر بودركه الله نوردر و انده هیچ بر ظلمت یوقدر٦ اگر انڭ ایله مشاركتمز واردر دیوبده ظلمتده یورور ایسه‌ك یالان سویلیوب حقیقتك اجراسنده بولنمیز٧ اما اگر انڭ نورده اولدیغی كبی نورده یورور ایسه‌ك بری بریمز ایله مشاركتمز اولور و انڭ اوغلی عیسی [المسیح]ك قانی بزی هر كناهدن پاكلر٨ اگر كناهمز یوقدر دیر ایسه‌ك كندمزی آلدادرز حقیقت دخی بزده دكلدر٩ اگر كناهلرمزی اقرار ایدر ایسه‌ك كناهلرمزی عفو ایدوب بزی هر حقسزلقدن پاكله‌مك ایچون او صادق و عادلدر١٠ اگر كناه ایشلمه‌مش ایز دیر ایسه‌ك انی یالانجی چیقارورز و انك كلامی بزده دكلدر