٢
١ ای چوجوقلرم سزه بوشیلری یازیورم كه كناه ایشلمیه‌سڭز و اگر بر كیمسه كناه ایشلیه‌جك اولور ایسه پدرك نزدنده شفاعتجیمز صالح عیسی المسیح واردر٢ او دخی كناهلرمزه و یالڭز بزمكیلره دكل آنجق بتون دنیانك كناهلرینه دخی كفارتدر.٣ و انی بیلدیكمزی امرلرینی حفظ ایتدیكمزدن بیلورز.٤ انی بیلورم دیوبده امرلرینی حفظ ایتمیان كیمسه یالانجیدر و حقیقت انده دكلدر٥ لكن هر كیمكه انك كلامنی حفظ ایدر ایسه فی الحقیقه بو كیمسه‌ده الله محبتی كمال بولمشدر. انده بولندیغمزی بونكله بیلورز٦ انده قالورم دیان كیمسه انك یورودیكی مثللو كندیسی دخی اویله یورومك كركدر.٧ ای سوكیلولر سزه یكی بر امر دكل آنجق ابتدادن مالك اولدیغڭز قدیم امری یازیورم. اشبو قدیم امر [ابتدادن] ایشیتدیكڭز كلامدر٨ ینه سزه یكی بر امر یازیورم او دخی انده هم سزده حقدر زیرا ظلمت كچمكده و حقیقی نور حالا ضیا ویرمكده‌در٩ نورده ایم دیوبده برادرینه بغض ایدن شمدی‌یه قدر ظلمتده‌در.١٠ برادرینی سون نورده قالور و انده سورچمه سببی یوقدر١١ لكن برادرینه بغض ایدن ظلمتده‌در و ظلمتده كزوب نره‌یه كیتدیكنی بیلمز چونكه ظلمت انك كوزلرینی كور ایتمشدر١٢ ای چوجوقلر سزه یازیورم چونكه انك اسمی ایچون كناهلرڭز عفو اولندی١٣ ای پدرلر سزه یازیورم چونكه ابتدادن اولانی بیلدیڭز. ای نوجوانلر سزه یازیورم چونكه شریره غالب اولدیڭز. ای صبیان سزه یازیورم چونكه پدری بیلدیڭز١٤ ای پدرلر سزه یازدم چونكه ابتدادن اولانی بیلدیڭز. ای نوجوانلر سزه یازدم چونكه قوتلوسڭز و اللهك كلامی سزده قالور و شریره غالب اولدیڭز.١٥ دنیایی و دنیاده اولان شیلری سومیڭز. اگر بر كیمسه دنیایی سور ایسه انده پدره محبت یوقدر١٦ زیرا دنیاده اولان هر شی یعنی تن شهوتی و كوز شهوتی و عمرك تكبری پدردن دكل آنجق دنیادندر.١٧ و دنیا و انك شهوتی زائل اولور لكن اللهك ارادتنی اجرا ایدن الی‌الابد قالور.١٨ ای چوجوقلر اخر زماندر و دجال گلور دیو ایشیتدیكڭز مثللو شمدی دخی چوق دجاللر كلمشدرلر. بو سببدن اخر زمان اولدیغنی اكلایورز١٩ بزدن چیقدیلر ایسه‌ده بزدن دكللر ایدی زیرا اگر بزدن اولسه‌لر ایدی بزم ایله قالمش اولورلر ایدی اما چیقملری انلرك جمله‌سنك بزدن اولمادقلری آشكار اولمق ایچون اولدی٢٠ سزڭ ایسه مقدّس طرفندن مسحڭز اولمغله هر شیئی بیلورسڭز٢١ حقیقتی بیلمدیكڭز ایچون سزه یازمادم آنجق انی بیلدیكڭز و هیچ بر یالان حقیقتدن اولمادیغی ایچون یازدم٢٢ عیسانك مسیح ایدیكنی انكار ایدندن غیری یالانجی كیمدر. پدری و اوغلی انكار ایدن، دجال اودر٢٣ اوغلی هر انكار ایدن پدره دخی مالك دكلدر اوغلی اقرار ایدن پدره دخی مالكدر٢٤ ایمدی ابتدادن ایشیتدیكڭز شی سزده قالسون. اگر ابتدادن ایشیتدیكڭز شی سزده قالور ایسه سز دخی اوغلده و پدرده قاله‌جقسڭز٢٥ و كندینك بزه ایتدیكی وعد بودر یعنی ابدی حیاتدر٢٦ سزی اضلال ایدنلر حقنده بو شیلری سزه یازدم٢٧ و سزڭ انك طرفندن آلدیغڭز مسح سزده قالور و بر كیمسه‌نك تعلیم ایتمسنه احتیاجڭز یوقدر آنجق مادامكه اول مسح سزه هر شی حقنده تعلیم ایدر و حق اولوب یالان دكلدر و نصل كه سزه تعلیم ایتدی ایسه انده قالڭز.٢٨ و شمدی ای چوجوقلر انده قالڭز تا كه او اظهار اولندیغی زمان جسارتمز اولسون و ظهورنده اندن خجل اولمایه‌لم٢٩ اگر انك صالح اولدیغنی بیلور ایسه‌ڭز صلاحی ایشلیان هر كیمسه‌نك اندن طوغدیغنی بیلورسڭز.