٣
١ ای سوكیلولر شمدی بو ایكنجی رساله‌یی سزه یازوب ایكیسنده سزڭ صافی ذهنكزی اخطار طریقیله اویاندررم٢ كه مقدّس پیغمبرلر طرفندن مقدّما تبلیغ اولنان سوزلری و بزم یعنی رب و خلاصكارك رسوللرینك تنبیهی درخاطر ایده‌سڭز٣ اوّل امرده معلومڭز اولسونكه صوك كونلرده شهوتلرینه كوره یورویان مستهزیلر گلوب٤ انڭ ظهورینك وعدی نره‌ده‌در زیرا اجدادك اویودقلری وقتدنبرو هر شی خلقتك ابتداسندنبرو اولدیغی كبی قالیور دیه‌جكلردر٥ زیرا انلر بوندن قصداً بیخبر طوریورلركه سماوات ابتدادن اولوب زمین اللهك كلامیله صودن و صو ایله قائمدر٦ بونلرله اولوقتده بولنان دنیا صویك طغیانیله هلاك اولدی٧ شمدیكی سماوات و زمین ایسه همان اول كلامله محفوظ اولوب حكم و فاسق ادملرك هلاكی كوننه‌دك آتش ایچون صاقلانلمشدرلر٨ و لكن ای سو كیلولر شو بر شیدن یعنی ربك عندنده بر كون بیك ییل كبی و بیك ییل بر كون كبی اولدیغندن بیخبر اولمایه‌سڭز٩ رب بعضلرك كجكمشدر ظن ایتدكلری كبی وعدنده كجكمز لكن بر كیمسه‌نك هلاك اولمسنی دكل آنجق جمله‌ن توبه‌یه كلمسنی استمسیله حقمزده تأنی ایلر١٠ و لكن ربك گونی [كیجه‌ده] خرسز كبی كله‌جك انده دحی سماوات كورلدیله زائل اوله‌رق عناصر یانمغله حل اولنه‌جقدر و زمین ایله انده یاپلمش بولنان شیلر یانه‌جقدر١١ ایمدی بونلرك جمله‌سی حل اولنه جغندن سز اللهك كوننك كلمسنه منتظر اوله‌رق عجله ایدوب مقدّس حركتلرده و تقواده نصل كیمسه‌لر اولمڭز كركدر١٢ اول كون كه انده سماوات طوتشوب حل اولنه‌جق و عناصر یانوب اریه‌جكدر١٣ لكن انڭ وعدی اوزره صلاحك ساكن اوله‌جغی یكی سماوات و یكی زمینه منتظر ایز.١٤ بو اجلدن ای سو كیلولر بو شیلره منتظر اولدیغڭز حالده انڭ عندنده سلامتله لكه‌سز و قصورسز بولنمكزه جهد ایلیڭز١٥ و ربمزك تأنیسنی خلاص عدّ ایدڭز نته كیم سو كیلو برادرمز پولس دخی كندینه احسان بیوریلان حكمته كوره١٦ جمله رساله‌لرنده بو شیلردن بحث ایتدیكی مثللو سزه دخی یازمشدر. بونلرده بعض كوج اكلاشیلور شیلر اولمغله جاهل و ثباتسز كیمسه‌لر سائر كتابلر حقنده ایتدكلری كبی كندی هلاكلری ایچون بونلرك معناسنی دخی تبدیل ایدرلر١٧ ایمدی سز ای سو كیلولر بونی اوّلدن بیلمكله صاقنڭز اولمایه‌كه فاسقلرك حیله‌سنه طوتیله‌رق كندی ثباتكزدن دوشه‌سڭز١٨ اما رب و خلاصكارمز عیسی المسیحك عنایتنده و علمنده نما بولڭز. اڭا هم شمدی همده ابده‌دك حمد اولسون آمین.