٢
١ ایمدی هر درلو شرّی و هر درلو حیله و ریالر ایله حسدلری و هر درلو غیبتی ترك ایدوب٢ هنوز طوغمش معصوملر كبی خالص روحانی سوده آرزوكش اولڭز٣ تا كه ربك لطیف اولدیغنی طاتدیغڭز تقدیرده انك واسطه‌سیله خلاص ایچون بیویه‌سڭز٤ اڭا یعنی انسان طرفندن مردود ایسه‌ده اللهك عندنده منتخب و ذیقیمت اولان دیری طاشه یاقلاشوب٥ سز دخی دیری طاشلر كبی بر بیت روحانی اللهه عیسی المسیح واسطه‌سیله مقبول اولان روحانی ذبیحه‌لری تقدیم ایچون بر مقدّس كاهنلك اولمق اوزره بنا اولنورسڭز٦ بوكا بناءً اشته صهیونده بر كوشه طاشی منتخب و ذیقیمت بر طاش قورم و اڭا ایمان ایدن اصلا خجل اولمایه جقدر دیو كتابده بولنور٧ ایمدی سز مؤمنلره بو ذیقیمتدر اما اطاعتسزلره یاپوجیلرك رد ایتدكلری طاش كوشه طاشی اولدی٨ و اینانمایوب كلام خصوصنده سورچنلره توڭز طاشی و سورچمك قیاسیدر. بوكا دخی تقدیر اولندیلر٩ لكن سز منتخب بر نسل و ملوكانه كاهنلك و مقدّس امت و خاص بر قوم‌سڭز تاكه سزی ظلمتدن كندی عجیب نورینه دعوت ایدنك فضیلتلرینی اعلان ایده‌سڭز١٠ سز بر زمان قوم دكل ایدیڭز اما شمدی اللهك قومی‌سڭز. مرحمته نائل اولمامش ایدیڭز شمدی ایسه مرحمته نائل اولدیڭز١١ ای سوكیلولر سزه رجا ایدرمكه غریبلر و مسافرلر كبی جانه قارشو محاربه ایدن نفسانی شهوتلردن اجتناب ایده‌سڭز١٢ و طائفه‌لر اراسنده حسن حركتده بولنه‌سڭز تا كه سزی شرّ ایشلیان دیو ذم ایتدكلری یرده ایو عمللركزی مشاهده ایتملریله زیارت كوننده اللهی تمجید ایده‌لر١٣ ایمدی رب ایچون تنظیمات بشریه‌نك هر برینه كرك پادشاهه جمله‌یه فائق اولدیغندن١٤ كرك والیلره شرّ ایشلیانلرك مجازاتی و خیر ایشلیانلرك مدحی ایچون انك طرفندن ارسال اولنانلر بولندقلرندن اطاعت ایدڭز١٥ زیرا اللهك ارادتی بودركه حرّلر كبی١٦ اما حرّیتكزی شرّه اورتی طوتمایوب آنجق اللهك قوللری كبی اوله‌رق جاهل ادملرك جهالتنی خیر ایشلمكله اسكات ایده‌سڭز١٧ جمله‌یه حرمت ایدڭز. برادرلری سوڭز. اللهدن قورقڭز. پادشاهه حرمت ایدڭز.١٨ ای خدمتكارلر افندیلر كزه هر قورقو ایله یالڭز ایو و حلیم اولانلره دكل آنجق بدخوی اولانلره دخی مطیع اولڭز١٩ زیرا بر كیمسه‌نك ناحق یره الم چكر ایكن الله حضورنده اولان ضمیر سببندن مشقته تحمل ایتمسی فضیلتدر٢٠ زیرا قباحت ایشلیوب ضرب اولندیغڭز حالده صبر ایدر ایسه‌ڭز نه شرفڭز اولور و لكن خیر ایشلیه‌رك الم چكدیككزده صبر ایدر ایسه ڭز اللهك عندنده بو فضیلتدر٢١ زیرا بوكا دعوت اولندیڭز. چونكه مسیح دخی سزڭ ایچون الم چكوب ایزلرنده یورومه‌ڭز ایچون سزه اورنك براقدی٢٢ كندیسی كناه ایشلمدی و لساننده حیله بولنمادی٢٣ شتم اولندیغنده اڭا مقابل شتم ایتمز ایدی. الم چكر ایكن تهدید ایتمیوب آنجق حق اوزه حكم ایدنه كندینی حواله ایدر ایدی٢٤ و كندیسی كندی جسدنده كناهلرمزی آغاج اوزرنده یوكلندی تا كه بز كناهلره اولمش اوله‌رق صلاحه یاشایه‌لم. انك بره‌سیله شفا بولدیڭز٢٥ زیرا یولی شاشرمش قویونلر كبی ایدیڭز لكن شمدی جانلركزك چوباننه و ناظرینه دوندیڭز