١
١ اللهك و رب عیسی المسیحك قولی یعقوب طاغلمش اولان اون ایكی سبطه سلام ایدر.٢ ای برادرلرم درلو درلو تجربه‌لره دوچار اولدیغڭز زمان انی كلیاً مسرّت عدّ ایلیڭز٣ چونكه ایمانكزك امتحانی صبر حصوله كتوردیكنی بیلورسڭز٤ اما بر شیده نقصانڭز اولمایه‌رق كامل و تام اولمڭز ایچون صبرك عملی مكمل اولسون.٥ و اگر سزدن برینك حكمتده نقصانی وار ایسه تعییب ایتمیه‌رك جمله‌یه غنیلكله احسان ایدن اللهدن دیله‌سون و اڭا ویریله‌جكدر٦ فقط اصلا شبهه ایتمیه‌رك ایمانله دیله‌سون زیرا شبهه ایدن كیمسه روزكارله سوریلوب چالقانال دڭز طالغه‌سنه بكزر٧ بو مقوله ادم رب طرفندن بر شی آله‌جغی ظننده بولنماسون٨ ایكی فكرلو ادم جمله یوللرنده ثباسزدر٩ حقیر اولان برادر كندی یوكسكلكیله١٠ زنكین اولان ایسه كندی حقیرلكیله افتخار ایتسون زیرا اوتك چیچكی كبی كچه‌جكدر١١ چونكه كونش شدتلو حرارتله طوغنجه اوتی قورودر و چیچكی دوكلوب شكلنك كوزللكی ضایع اولور كذلك زنكین دخی كندی طریقلرنده صوله‌جقدر.١٢ نه مباركدر تجربه‌یه تحمل ایدن ادم زیرا تجربه‌ده مقبول بولندیغی حالده ربك كندینی سونلره وعد ایلدیكی حیات تاجنی آله‌جقدر١٣ هیچ بر كیمسه اغوایه دوچار اولدیغنده الله طرفندن اغوا اولنیورم دیمسون زیرا الله كوتر شیلرله نه اغوا اولنور نه‌ده كندیسی برینی اغوا ایدر١٤ لكن هر كس كندی شهوتندن جذب اولنوب الدانمسیله اغوایه دوشر١٥ بعده شهوت حامله اولوب كناه طوغرور و كناه كمالنی بولدقده اولوم طوغرور١٦ ای سوكیلو برادرلرم آلدانمایڭز.١٧ هر ایو عطیه و هر كامل موهبه یوقاریدن اولوب نورلر پدرندن نزول ایدر. انده تغیر یاخود تبدیل كولكه‌سی یوقدر١٨ او دخی مرادینه كوره كندی مخلوقاتنك بر نوع طرفانده‌سی اولمامز ایچون بزی حقیقت كلامیله تولید ایلدی.١٩ ایمدی ای سوكیلو برادرلرم هر ادم ایشیتمكده چابك سویله‌مكده یواش غضبده یواش اولسون٢٠ زیرا ادمك غضبی اللهك صلاحنی اجرا ایتمز٢١ بو اجلدن هر ناپاكلكی و شرّك چوقلغنی ترك ایدوب درونكزده اكلمش و جانكزی خلاص ایتمكه قادر اولان كلامی حلمله قبول ایدڭز٢٢ لكن كندی كندیكزی آلداده‌رق كلامڭ یالڭز ایشیدیجیلری اولمایوب انك اجرا ایدیجیلری اولڭز٢٣ زیرا اگر بر كیمسه كلامڭ ایشید یجیسی اولوبده اجرا ایدیجیسی دكل ایسه آیینه‌ده كندی اصل یوزینه باقان ادمه بكزر٢٤ چونكه كندی كندینه باقوب كیتد كدنصكره در عقب نه شكل ایدیكنی اونوقدی٢٥ لكن حرّیتك كامل شریعتنه دقت ایدوب دوام ایدن كیمسه ایشیدر اونودر اولمایوب آنجق عملی اجرا ایدن اولمغله كندی عملنده مبارك اوله‌جقدر٢٦ اگر [اراكزده] بر كیمسه كندینی دیندار ظن ایدرده كندی دیلنی ضبط ایتمیوب كندی قلبنی آلدادور ایسه بونڭ دیانتی باطلدر٢٧ پدر اللهك عندنده پاك و لكه‌سز دیانت بودر یعنی یتیملر ایله طول قاریلری مضایقه‌لرنده زیارت ایتمك و كندی نفسنی دنیادن لكه‌سز حفظ ایتمكدر.