٢
١ ای برادرلرم ذوالجلال ربمز عیسی المسیحك ایماننی خاطره رعایت ایده‌رك طوتمایڭز٢ زیرا اگر جماعتكزه آلتون یوزوكلو ومزین البسه‌لو بر ادم كیروبده كیرلو البسه‌لو بر فقیر دخی كیره‌جك اولور ایسه٣ و سزمزین البسه‌یی كیمش اولانه رعایت ایده‌رك سن بوراده عزتله اوتور دیوبده اول فقیره سن اوراده طور یاخود شوراده باصامغمك یاننده اوتور دیه‌جك اولور ایسه‌ڭز٤ بینكزده تفریق ایتمزمیسڭز و كوتو افكارلو حاكملر اولمازمیسڭز٥ دیكله‌یڭز ای سو كیلو برادرلرم الله بو دنیانك فقیرلرینی ایمانده زنكین و كندینی سونلره وعد ایتدیكی ملكوتك وارنلری اوله‌جق اولانلری انتخاب ایتمدیمی٦ سز ایسه فقیری تحقیر ایتدیڭز. سزه مسلط اولانلر زنكینلر دكلمیدر و سزی محكمه‌لره چكنلر انلر دكلمیدر٧ تسمیه اولندیغڭز اسم شریفه كفر ایدن انلر دكللرمی٨ ایمدی اگر كتابه كوره قوكشوكی كندك كبی سوه‌سین دیو بیوران ملوكانه شریعتی اجرا ایدر ایسه ڭز ایو ایدرسڭز٩ اما اگر خاطره رعایت ایتمكده بولنور ایسه ڭز كناه ایشلیوب شریعت طرفندن قباحتلو كبی تعزیر اولنورسڭز١٠ زیرا هر كیم بتون شریعتی حفظ ایدوب بر شیده خطا ایده‌جك اولور ایسه جمله‌سنه صوچلو اولمش اولور١١ زیرا زنا ایتمیه‌سین دیان كذلك قتل ایتمیه‌سین دیدی. ایمدی اگر زنا ایتمیوبده قتل ایدر ایسه‌ك شریعتی تجاوز ایتمش اولورسین١٢ حرّیت شریعتی موجبنجه محاكمه اولنه‌جق كیمسه‌لر كبی سویلیڭز و ایشلیڭز١٣ زیرا مرحمت ایتمه‌مش اولانه بلامرحمت حكم اوله‌جقدر و مرحمت حكم علیهنه افتخار ایدر١٤ ای برادرلرم اگر بر كیمسه ایمانم وار دیوبده عمللری اولماز ایسه نه فائده اولور. اول ایمان انی قورتاره‌بیلورمی١٥ و اگر بر برادر یا همشیره چیلاق و یومی تعیشه محتاج اولدیغی حالده١٦ سزدن بری انلره سلامتله كیدڭز ایصینمش و طویمش اوله‌سڭز دیوبده جسده اقتضا ایدن شیلری انلره ویرمز ایسه ڭز نه فائده اولور١٧ بویله‌جه ایمان دخی عمللری اولمادقجه ذاتنده اولودر١٨ لكن بری دیه‌جكدر كه سنڭ ایمانك وار و بنم عمللرم وار. سن بڭا ایمانكی عمللرك اولمقسزین گوستر بن دخی سڭا ایمانمی عمللرمدن كوستره‌یم١٩ سن الله بر ایدیكنه اینانورسین. ایو ایدرسین شیطانلر دخی اینانورلر و دتررلر٢٠ اما ای باطل ادم ایمانك عملسز اولدیغی حالده بوش ایدیكنی بیلمك استرمیسین٢١ پدرمز ابراهیم اوغلی اسحقی مذبح اوزرنده تقدیم ایتدیكنده عمللرله تبریر اولنمادیمی٢٢ ایمان عمللری ایله برابر ایشلدیكنی و ایمان عمللرله اكمال اولندیغنی كورمیورمیسین٢٣ و ابراهیم اللهه ایناندی و اڭا صلاح عدّ اولندی دیو بیوران كلام اتمام اولنوب خلیل الله تسمیه اولندی٢٤ ایمدی ادم یالڭز ایمانله دكل فقط عمللرله تبریر اولندیغنی كورمیورمیسڭز٢٥ كذلك فاحشه راحاب دخی جاسوسلری قبول ایدوب بشقه یولدن كوندردیكنده عمللرله تبریر اولنمادیمی٢٦ زیرا جسد روح اولمادقجه اولو اولدیغی مثللو ایمان دخی عمل اولمادقجه اولودر