٣
١ ای برادرلرم چوغڭز معلم اولمایڭز چونكه دها بیوك جزایه دوچار اوله‌جغمزی بیلورسڭز٢ زیرا جمله‌مز چوق كره خطا ایدرز. اگر بر كیمسه كلامده خطا ایتمز ایسه اول كیمسه كامل ادم اولوب بتون جسدینك ضبطنه دخی مقتدردر٣ اشته آتلرك بزه اطاعت ایتملری ایچون آغزلرینه كم اوروب بتون جسدلرینی چویررز٤ اشته كمیلردخی اول قدر بیوك اولوب شدتلو روزكارلرله سوروكلنور ایكن پك كوچوك بر دومن واسطه‌سیله دومنجینك كوكلی استدیكی طرفه چویریلور.٥ بویله‌جه دیل دخی كوچوك بر عضو ایسه‌ده غایت بیوك سویلر. اشته جزئی آتش نه قدر اودون طوتشدرور٦ دیل دخی آتش و فساد عالمی‌در. دیل اعضامزده بویله یر طوتمشدر كه بتون جسدی ناپاك ایدر و كائناتك دائره‌سنی آلولندروب كندیسی دخی جهنمدن آلولنور٧ زیرا هر نوع وحشی حیوان و قوش و حشرات ایله دكزده بولنانلر نوع بشر واسطه‌سیله ضبط اولنور و ضبط اولنمشدر٨ اما هیچ بر ادم دیلك ضبطنه مقتدر دكلدر. منع اولنماز بر شرّ اولوب هلاك ایدیجی زهرله طولودر٩ انكله پدر اللهه حمد ایدرز و انكله دخی اللهك مشابهتنه كوره خلق اولنمش انسانه بددعا ایدرز١٠ همان بر آغزدن خیر دعا و بددعا چیقار. ای برادرلرم بو شیلر بویله اولماملیدر١١ هیچ بر پیكار همان بر كوزدن طاتلو و آجی صوچیقارورمی.١٢ ای برادرلرم انجیر آغاجی زیتون و یا آصمه انجیر حصوله كتوره‌بیلورمی. كذلك هیچ بر پیكار طوزلو و طاتلو صو ویره‌مز١٣ اراكزده حكمت و معلومات صاحبی كیم ایسه حسن حركتیله كندی عمللرینی حكمت حلمنده كوسترسون١٤ اما اگر قلبلركزده آجی حسد و منازعه وار ایسه حقیقتك علیهنه تفاخر ایدوب یالان سویله‌میه‌سڭز١٥ بو حكمت یوقاریدن اینمیوب آنجق دنیوی و نفسانی و شیطانیدر١٦ زیرا حسد و منازعه نره‌ده ایسه نظامسزلق و هر كوتو شی اوراده بولنور١٧ اما یوقاریدن اولان حكمت اوّلا پاكدر صكره مصلح لطیف حلیم مرحمت و ایو میوه‌لرله مملو غرضسز و ریاسزدر١٨ و صلاحك ثمره‌سی صلح ایدیجیلر ایچون سلامتله اكیلور