٤
١ بو شیلردنصكره كوردمكه سماده آچلمش بر قپو وار ایدی و بورو صداسی كبی بنم ایله سویلشدیكنی ایشیتمش اولدیغم اوّلكی صدا بورایه چیق و بوندنصكره واقع اوله‌جق شیلری سڭا كوستره‌یم دیدی٢ و در عقب اوزرمه روح گلدی و اشته سماده قورلمش بر تخت و تختك اوزرنده بر اوتوران وار ایدی٣ و اول اوتوران كورونشده یشم و قرمزی عقیق طاشنه بكزر ایدی. و تختك اطرافنده كورونشده زمرده بكزر قوس قزح وار ایدی٤ و تختك اطرافنده یكرمی دردت تخت بولنوب اول تختلر اوزرنده دخی بیاض البسه كیمش و باشلرنده آلتون تاجلری اولان یكرمی‌درتت اختیار اوتورمش [كوردم]٥ و تختدن شمشكلر و كورلتیلر و صدالر چیقیور ایدی. و تختك اوكنده اللهك یدی روحی اولان یانوب آلونان یدی قندیل وار ایدی٦ و تختك اوكنده بللوره بكزر صرچه‌دن بر دڭز اولوب تختك اورتاسنده و تختك اطرافنده اوكی و آرقه‌سی كوزلرله طولو درت ذی‌روح وار ایدی٧ و برنجی ذی‌روح آرسلانه بكزر و ایكنجی ذی‌روح بوزاغی‌یه بكزر و اوچنجی ذی‌روحك یوزی انسان یوزی كبی و دردنجی ذی‌روح اوچان قرتاله بكزر ایدی.٨ و درت ذی روحك هر برینك اطرافنده آلتیشر قنادی بولنوب ایچ طرفدن كوزلرله طولو ایدیلر. و كیجه كوندوز فراغت ایتمیه‌رك قدوس قدوس قدوس موجود اولمش و اولان و اوله‌جق و هر شیئه قادر رب الله دیرلر ایدی٩ و ذی‌روحلر تختك اوزرنده اوتوران و الی‌الابد حی اولانه حمد و عزت و شكر عرض ایتدكلرنده١٠ اول یكرمی درت اختیار تختك اوزرنده اوتورانك حضورنده یره قپانوب الی‌الابد حی اولانه سجده قیلارلر و تاجلرینی تختك اوكنه براغوب١١ یا رب اللهمز حمد و عزت و قدرت آلمغه لایق‌سین زیرا هر شیئی سن خلق ایلدك و سنڭ ارادتكله موجوددر و خلق اولندیلر دیرلر ایدی.