٥
١ و تختده اوتورانك صاغ النده ایچریسی و آرقه‌سی یازلمش و یدی مهرله مهرلنمش بر كتاب كوردم٢ و كتابی آچوب مهرلرینی چوزمكه لایق كیمدر دیو یوكسك سسله ندا ایدن بر قوتلو ملك كوردم٣ و كرك سماده و كرك زمینده و زمین آلتنده كتابی آچمغه یاخود اڭا نظر قیلمغه كیمسه مقتدر دكل ایدی٤ و كتابی آچمغه [ و اوقومغه ] یاخود اڭا نظر قیلمغه كیمسه لایق بولنمادیغی ایچون بن زیاده‌سیله آغلایور ایدم٥ و اختیارلردن بری بڭا دیدیكه آغلامه اشته داودك اصلی اولوب یهودا سبطندن اولان آرسلان كتابی آچوب یدی مهرینی چوزمكه ظفریاب اولدی٦ و تخت ایله درت ذی‌روحك اورتاسنده و اختیارلرك اورتاسنده یدی بوینوزه و اللهك بتون زمینه ارسال اولنان یدی روحی اولان یدی كوزه مالك اوله‌رق كویا ذبح اولنمش بر قوزی طورمقده كوردم٧ او دخی گلوب تختده اوتورانك صاغ الندن كتابی آلدی٨ و كتابی آلدیغی كبی اول درت ذی‌روح و هر برینك النده بر طنبور و مقدّسلرك دعالری اولان بخورله طولو آلتون طاسلر بولنان اول یكرمی درت اختیار قوزینك حضورنده یره قپاندیلر٩ و بر یكی تسبیح ترنم ایده‌رك كتابی آلوب مهرلرینی آچمغه لایق‌سین چونكه ذبح اولندك و قانكله بزی اللهه هر قبیله و لسان و قوم و ملت ایچندن صاتین آلدك١٠ و بزی اللهمزك حضورنده ملِكلر و كاهنلر ایلدك بز دخی زمین اوزرنده سلطنت ایده‌جكر دیرلر ایدی١١ و كوردم و تخت ایله ذی‌روحلر و اختیارلرك اطرافنده چوق ملكلرك سسنی ایشیتدم انلرك مقداری دخی اون بیك كره اون بیكلر و بیكلرجه بیكلر اولوب یوكسك سسله١٢ ذبح اولنمش اولان قوزی قدرت و غنا و حكمت و قوت و عزت و حمد و بركتی آلمغه لایقدر دیرلر ایدی١٣ و سماده و زمینده و زمین آلتنده بولنان هر بر مخلوقك و دكزده اولانلرك و انلرده بولنان جمله موجوداتك تختده اوتوران ایله قوزی‌یه بركت و عزت و حمد و قدرت ابدالاباد مخصوصدر دیدكلرینی ایشیتدم١٤ اول درت ذی‌روح دخی آمین دیدیلر و اول اختیارلر یره قپانوب سجده قیلدیلر.