١
١ عیسی المسیحك قولی و یعقوبك قارنداشی یهودا پدر اللهد. سوكیلو و عیسی المسیحده حفظ اولنان دعوتلولره٢ سزه مرحمت و سلامت و محبت آرتسون.٣ ای سوكیلولر مشترك اولان خلاص خصوصنده سزه یازمق اوزره غیرت كامله‌ده اوله‌رق مقدّسلره بر دفعه تسلیم اولنمش اولان ایمان ایچون مجاهده ایده‌سڭز دیو نصیحت ایده‌رك یازمه‌می لازم كوردم.٤ زیرا بو حكم ایچون قدیمدن تقدیر اولنمش بعض فاسق كیمسه‌لر كیزلوجه گیروب اللهمزك عنایتنی فجوره تبدیل ایله صاحب واحد اولان [اللهی] و ربمز عیسی المسیحی انكار ایدرلر٥ و هر نه قدر معلومڭز ایسه‌ده سزه اخطار ایتمك استرمكه رب قومی مصر دیارندن قورتاردقدن صكره ینه ایمان ایتمیانلری هلاك ایلدی٦ هم كندی ریاستلرینی حفظ ایتمیوب مكانلرینی ترك این ملكلری عظیم كونك حكمی ایچون ابدی بندلرله ظلمت آلتنده حفظ ایلدی٧ نصل كه سدوم و غموره و اطرافلرنده بولنوب انلرك امثالی اوزره ارتكاب زنا ایده‌رك بشقه جسد آردینه‌دوشن شهرلر ابدی آتشك عذابنه دوچار اولمش اوله‌رق عالمه عبرت اولدیلر٨ كذلك بو خولیا صاحبلری دخی جسدی مردار ایدرلر و حكومتی تحقیر ایدوب اشرافه سبّ ایدرلر.٩ اما باش ملك میخائیل شیطانه مخالفت ایدوب موسانك جسدینه دائر مجادله ایدر ایكن علیهنده سبّ ایله حكم ایتمكه جسارت ایتمیوب آنجق سنی رب تعزیر ایتسون دیدی١٠ بونلر ایسه بیلمدكلری شیلره سبّ ایدرلر و دیلسز حیوانلر مثللو بالطبع اكلادقلری شیلرده فاسد اولورلر١١ وای انلره زیرا قایینك مسلكنده یورودیلر و اجرت ایچون بلعامك ضلالتی آردی صره قوشدیلر و قوراحك ایتدیكی كبی مخالفتده هلاك اولدیلر١٢ بونلر سزڭ محبت ضیافتلركزده لكه‌لر اولوب سزڭ ایله ییوب ایچه‌رك نفسلرینی قورقوسز بسلرلر روزكارلردن اوته بری سوروكلنان صوسز بولوتلر چپلاق و میوه‌سز ایكی كره قورومش كوكدن قوپارلمش آغاجلردرلر١٣ كوپوك كبی كندی عیبلرینی چیقاران شدتلو دڭز طالغه‌لریدرلر. آواره یلدزلردركه شدتلو ظلمت انلر ایچون الی‌الابد حفظ اولنمشدر١٤ و بونلرك حقنده ادمدن یدنجی اولان اخنوخ دخی وحی ایله سویلیوب دیدیكه اشته‌رب جمله‌یی حكم ایلمك و جمله فاسقلری ارتكاب ایتدكلری فاسقانه عمللرینك كافه‌سی ایچون١٥ و فاسق كناهكارلرك كندی علیهنده سویله‌دكلری جمله سرت شیلردن طولایی الزام ایتمك ایچون اون بیكلرجه مقدّسلری ایله گلدی١٦ بونلر مرلدانیجیلر كندی حاللرندن تشكی ایدیجیلر كندی شهوتلرینه كوره یورویوب آغزلری بیوك سویلیه‌رك كار ایچون مداهنه ایدرلر١٧ لكن سز ای سوكیلولر ربمز عیسی المسیحك رسوللری طرفندن مقدّما سزه تبلیغ اولنان سوزلری یعنی١٨ آخر زمانده كندی فسقلرینك شهوتلرنجه یورویان مستهزیلر اوله‌جقلردر دیدكلرینی خاطركره كتورڭز١٩ بونلر آیریلانلر و نفسانیلر و روحه مالك اولمایان كیمسه‌لردر.٢٠ سز ایسه ای سوكیلولر كندیلركزی اقدس ایمانڭز اوزرینه بنا ایدوب روح القدسله دعا ایده‌رك٢١ كندیلركزی اللهك محبتنده حفظ ایدوب ابدی حیات ایچون ربمز عیسی المسیحك مرحمتنه منتظر اولڭز٢٢ و تفریق ایده‌رك بعضلرینه مرحمت ایدڭز.٢٣ بعضلرینی ایسه آتشدن قاپه‌رق قورقو ایله قورتارڭز و تن ایله لكه‌لنمش لباسدن بیله اكراه ایدڭز.٢٤ و سزی لكه‌سز صاقلامغه و كندی جلالنك حضورنده شادلقله قصورسز احضار ایتمكه قادر اولانه٢٥ خلاصكارمز اولان یالڭز اللهه ربمز عیسی المسیحك واسطه‌سیله هم ازلدن هم شمدی همده ابدالاباد عزت و عظمت قدرت و حكومت اولسون آمین.