١
١ عیسی المسیحك وحییدر یعنی یاقینده مطلقا وقوع بوله‌جق شیلری كندی قوللرینه كوسترمك اوزره اللهك اڭا ویردیكی و كندی ملكی واسطه‌سیله كوندروب قولی یوحنایه بیان ایلدیكی وحی‌در٢ او دخی اللهك كلامنه و عیسی المسیحك شهادتنه همان جمله كوردیكی شیلره شهادت ایلدی٣ نه مباركدر بو پیغمبرلكك سوزلرینی اوقویان و دیكله‌یوب ایچنده یازلمش اولان شیلری حفظ ایدنلر زیرا وقت یاقیندر.٤ یوحنا آسیاده بولنان یدی كلیسالره موجود اولان و اولمش و اوله‌جق طرفندن و انك تختی اوكنده بولنان یدی روح طرفندن٥ و صادق شاهد اولوب اولولردن قیام ایدنلرك ایلكی و دنیا ملِكلرینك رئیسی اولان عیسی المسیح طرفندن سزه عنایت و سلامت اولسون. بزی سووب كندی قانیله كناهلرمزدن ییقایه‌رق٦ و پدری اللهه ملِكلر و كاهنلر نصب ایدنه ابدالاباد عزت و قدرت اولسون آمین.٧ اشته بولوتلر ایله گلیور و هر كوز و انی دلانلر دخی انی كوره‌‌جكدر و انك سببندن زمینك جمله قبیله‌لری دوكنه‌جكلردر. بلی آمین٨ موجود اولان و اولمش و اوله‌جق و هر شیئه قادر رب الله بیورر كه الف و یا [ ابتدا و انتها] بن ایم.٩ بن یوحنا كه سزڭ برادرڭز و عیسی المسیحك مضایقه‌سی و ملكوتی و صبرنده شریكڭز ایم اللهك كلامی و عیسی المسیحك شهادتی ایچون پطموس دینلان اطه‌ده بولندم١٠ و ربك كوننده اوزرمه روح گلوب آردمدن بورو سسی كبی١١ [ الف و یا اوّل و آخربن ایم و ] كوردیككی بر كتابه یازوب [ آسیاده اولان] یدی كلیسایه یعنی افسوسه و ازمیره و برغمه‌یه و تیاتیره‌یه و ساردسه و فیلادلفیایه و لاود كیایه كوندر دیو بیوك بر سس ایشیتدم١٢ و بڭا سویلیان سس كیمك ایدیكنی كورمك ایچون دوندم و دوندیكمده یدی آلتون شمعدان١٣ و یدی شمعدانك اورتاسنده ابن الانسانه بكزر و ایاغنه قدر بر اثواب كیمش و كوكسنه بر آلتون قوشاق قوشانمش اولان بر ذات كوردم١٤ و باشی ایله صاچلری بیاض یپاغی مثللو قار كبی بیاض ایدی و كوزلری آتش آلوی كبی ایدی١٥ و ایاقلری فرونده قزارمش خاص پرنجه بكزر اوله‌رق سسی دخی چوق صولرك سسی كبی ایدی١٦ و صاغ النده یدی یلدز بولنوب آغزندن ایكی آغزلوكسكین بر قلیج چیقار ایدی چهره‌سی دخی قوتیله ضیا ویرن كونش كبی ایدی١٧ و انی كوردیكمده ایاقلرینه اولو كبی دوشدم او دخی صاغ النی اوزرمه قویه‌رق دیدیكه قورقمه اوّل و آخر١٨ و حیاتده اولان بن ایم و اولمش ایدم و اشته ابدالاباد حیاتده ایم [آمین] و هاویه ایله اولومك اناختارلری بنده‌در١٩ كوردیكك و حاضر اولان و بوندن صكره وقوع بوله‌جق شبلری٢٠ صاغ المده كوردیكك یدی یلدرنك سرّینی و یدی آلتون شمعدانی یاز. اول یدی یلدز یدی كلیسانك ملكلری اولوب [ كوردیكك ] یدی شمعدان دخی یدی كلیسادر.