٣
١ و ساردیسده اولان كلیسانك ملكنه یاز اللهك یدی روحنه و یدی یلدزه مالك اولان بویله بیورر سنڭ عمللركی یعنی دیری‌سین دیو اسمك وار ایكن اولو اولدیغكی بیلورم٢ اویانق اول و بقیه قالوب اولمك اوزره اولان شیلری قوتلندر زیرا سنڭ عمللركی اللهك حضورنده مكمل بولمادم٣ ایمدی نصل آلدیغكی و ایشیتدیككی خاطركه كتور و حفظ ایده‌رك توبه ایله. اویانق اولمادیغك تقدیرده سنڭ اوزركه خرسز كبی كله‌جكم و اوزركه قنغی ساعتده كله‌جكمی بیله‌میه‌جكسین٤ فقط ساردیسده بیله البسه‌لرینی كیرلتمه‌مش سنڭ بر قاچ كیمسه‌لرك بولنوب بونلر بنم ایله برابر بیاض البسه ایله كزه‌جكلر چونكه لایقدرلر٥ غالب اولان كیمسه بیاض البسه‌یی كیه‌جكدر بن دخی اسمنی حیات كتابندن اصلا محو ایتمیه‌جكم و انك اسمنی پدرمك و ملكلرینك حضورنده اقرار ایده‌جكم٦ قولاغی اولان كیمسه روحك كلیسالره سویله‌دیكنی ایشیتسون.٧ و فلادلفیاده اولان كلیسانك ملكنه یاز قدوس و حق و داودك اناختیارینه مالك اولوب آچدیغنی كیمسه قپایه‌ماز و قپادیغنی كیمسه آچه‌ماز اولان ذات بویله بیورر٨ سنڭ عمللركی بیلورم. اشته سنڭ اوككده كیمسه‌نك قپایه‌میه‌جغی بر آچیق قپو قودم زیرا بر آز قوتك اوله‌رق كلاممی حفظ ایلدك و اسممی انكار ایتمدك٩ اشته یهودی دكل ایكن آنجق یالان یره یهودی ایز دیه‌رك شیطانك جماعتندن اولانلری كتوره‌جكم. اشته انلری كتوروب ایاقلركك اوكنده سجده قیلدره‌رق انلره سنی سودیكمی بیلدره‌جكم١٠ صبرمك كلامنی حفظ ایلدیكك سببدن بن دخی سنی زمین اوزرنده ساكن اولانلری تجربه ایچون بتون دنیا اوزرینه كلمك اوزره اولان تجربه ساعتندن حفظ ایدرم.١١ اشته تیز كلورم. سنده بولنانی قوی طوت اولمایه‌كه بری تاجكی آله.١٢ غالب اولان كیمسه‌یی الهمك هیكلنده دیرك یاپه‌جغم و آرتق طیشاری چیقمایه‌جقدر و انك اوزرینه اللهمك اسمنی و اللهم طرفندن سمادن نزول ایدن اللهمك شهری یكی اورشلیمك اسمنی و بنم یكی اسممی یازه‌جغم١٣ قولاغی اولان كیمسه روحك كلیسالره سویله‌دیكنی ایشیتسون.١٤ و لاودیقیاده اولان كلیسانك ملكنه یاز اول آمین اول صادق و حق شاهد اللهك خلقتنك ابتداسی بویله بیورر١٥ سنڭ عمللركی بیلورم كه نه صوغوق نه‌ده صیجاق‌سین. كاشكی یا صوغوق یا صیجاق اولیدك١٦ ایمدی نه صوغوق نه صیجاق اولوب ایلیق اولدیغك ایچون سنی آغزمدن استفراغ ایده‌جكم١٧ زنكین ایم و مالدار اولدم و بر شیئه محتاج دكل ایم دیوب سن بیچاره و سفیل و فقیر و كور و چیلاق اولدیغكی بیلمدیكك اجلدن١٨ سڭا نصیحت ایدرمكه زنكین اولمق ایچون آتشده قال اولنمش آلتون و كیینوب چپلاقلغك عیبی كورونمه‌مسی ایچون بیاض البسه بندن صاتین آله‌سین و كورمه‌ك ایچون كوزلر كه علاج قویه‌سین١٩ بن جمله سودیكم كیمسه‌لری تعزیز و تأدیب ایدرم ایمدی غیرتلو اولوب توبه ایله٢٠ اشته قپوده طوروب چالیورم اگر بر كیمسه سسمی ایشیدرده قپویی آچار ایسه انك یاننه كیررم و بن انك ایله او دخی بنم ایله آقشام طعامی ایده‌جڭز.٢١ غالب اولانه بنم ایله تختمد اوتورمغی احسان ایده‌جكم نته كیم بن دخی غالب اولوب پدرم ایله انك تختنده اوتوردم٢٢ قولاغی اولان كیمسه روحك كلیسالره سویله‌دیكنی ایشیتسون.