٥
١ شمدی كلڭز ای زنكینلر اوزركزه كله‌جك بلالر ایچون فغان ایدوب اغلایڭز٢ مالڭز چورومش و اثوابكزی كووه ییمشدر.٣ آلتون ایله كومشڭز پاسلانمشدر و انلرك پاسی دخی علیهكزه شهادت ایچون اولوب تنلركزی آتش كبی ییه‌جكدر. صوك كونلرده خزینه ییغدیڭز٤ اشته تارلالركزی بیچن ایشجیلرك طرفكزدن آلیقونیلان اجرتی فریاد ایدیور و اوراقجیلرك فریادی رب الجنودك قولاغنه واصل اولدی٥ زمین أوزرنده دوق و صفا ایله یاشادیڭز. قلبلركزی ذبح كوننده اولدیغی كبی بسلدیڭز٦ صالح علیهنه حكم ایدوب انی قتل ایتدیڭز و او سزه قارشو طورماز٧ ایمدی ای برادرلر ربك ظهورینه دكین صبر ایدڭز. اشته چفتجی یرك قیمتلو محصولنه منتظر اولوب انك ایچون تا ایلك و صوك یاغموره نائل اولنجه‌یه‌دك صبر ایدر٨ سز دخی صبر ایدوب قلبلركزی ثابت قیلڭز زیرا ربك ظهوری یاقیندر٩ ای برادرلر یكدیكر كزدن شكایت ایتمیڭز كه حكم تحتنه دوشمیه‌سڭز. اشته حاكم قپونك اوكنده طوریور١٠ ای برادرلرم ربك اسمیله سویلیان پیغمبرلری مشقت چكمك و صبر خصوصنده اورنك طوتڭز١١ اشته صبر ایدنلره مبارك دیرز. ایوبك صبرینی ایشیتدیڭز و ربك تقدیر ایتدیكی عاقبتی كوردیڭز چونكه رب چوق مرحمتلو و رؤفدر١٢ ایمدی هر شیدن اوّل ای برادرلرم نه سما نه زمین حقی ایچون نه‌ده بشقه بر یمینله یمین ایدڭز كه حكم آلتنه دوشمیه‌سڭز آنجق سزڭ اوت دیدیكڭز اوت اولسون و سزڭ خیر دیدیكڭز خیر اولسون١٣ اراكزده بر كیمسه مشقتده‌میدر دعا ایتسون. بر كیمسه‌نك قلبی شنمیدرمزمور اوقوسون١٤ اراكزده بر كیمسه خسته‌میدر كلیسانك اختیارلرینی دعوت ایتسون و ربك اسمیله انی یاغله مسیح ایده‌رك انك ایچون دعا ایتسونلر١٥ و ایمانله اولان دعا خسته‌یی قورتارور رب دخی انی ایاغه قالدره‌جقدر و اگر كناه ایشلمش اولسه دخی اڭا عفو اولنه‌جقدر١٦ بری بریكزه خطالركزی اقرار و بری بریڭز ایچون دعا ایلیڭز تا كه شفا بوله‌سڭز. صالحك حرارتلو دعاسنك چوق تأثیری وار.١٧ ایلیا بزم ایله همحال بر ادم ایكن یاغمور یاغمامسی ایچون دعا ایلدی و زمین اوزرینه اوچ سنه آلتی آی مدت یاغمور یاغمادی١٨ و تكرار دعا ایلدی و كوك یاغمور ویروب یر دخی محصولنی یتشدردی.١٩ ای برادرلر اگر اراكزدن بری حقیقتدن ضلالته دوشرده بر كیمسه انی كیرو دوندرر ایسه٢٠ بیلسونكه كناهكاری كندی ضلالت یولندن دوندران كیمسه اولومدن جان قورتارور و بر خیلی كناه ستر ایتمش اولور