١٢
١ ایمدی بو قدر شاهد اطرافمزی بولوت كبی آلمش اولمغله هر آغرلغی و بزی قولایجه احاطه ایدن كناهی ترك ایدوب اوكمزه قونیلان یارشده ایمانی باشلایان و تكمیل ایدن عیسایه نظر ایده‌رك صبر قوشه‌لم٢ اولكه اوكنه قونیلان مسرّت ایچون حقارتی بر شی عدّ ایتمیه‌رك خاچه تحمل ایلدكدن صكره اللهك تختنك صاغنده اوتوردی٣ ایمدی كناهكارلر طرفندن كندی علیهنده وقوع بولان بو مثللو مخالفته تحمل ایدنی تفكر ایدڭز كه جانلرڭز عاجز و یورغون اولمایه٤ كناهه قارشو جهاد ایده‌رك قان دوكمك درجه‌سنه قدر دها مقاومت ایتمدیڭز٥ و ای اوغلم ربك تأدیبنی تحقیر ایتمه و انك طرفندن تكدیر اولندیغكده عاجز قالمه٦ زیرا رب سودیكنی تأدیب ایدر و قبول ایتدیكی هر اوغلی ضرب ایدر دیه‌رك اوغللره سویلر كبی سزه ویریلان نصیحتی اونوتدیڭز٧ اگر تأدیبه تحمل ایدر ایسه ڭز الله سزه اوغللره كبی معامله ایدر زیرا قنغی اوغل وار كه پدری انی تأدیب ایتمز٨ اما اگر جمله‌نك حصه‌دار اولدیغی تأدیبدن محزوم ایسه ڭز اول تقدیرده اوغل اولمایوب حرامزاد‌سڭز٩ همدخی جسدمزك پدرلری بزم مؤدبمز اولدقلری حالده انلره حرمت ایدر ایدك نه قدر زیاده یاشامق ایچون روحلرك پدرینه اطاعت ایتملو ایز١٠ زیرا بونلر كندیلرینه خوش كوروندیكنه كوره برآز وقت تأدیب ایدرلر ایدی لكن الله قدسیتنه حصه‌دار اوله‌لم دیو منفعت ایچون ایدر١١ واقعا هر بر تأدیب كندی وقتنده مسرّته دكل آنجق كدره سبب كورینور اما صكره انكله تربیه اولنمش اولانلره صلاحك سلامت ثمره‌سنی حصوله كتورر١٢ بو اجلدن ضعیف اللری و طاقتسز دیزلری قوتلندرڭز.١٣ و ایاقلرڭز ایچون طوغری یوللر یاپڭز تا كه طوپال اولان صاپمایوب آنجق شفا بوله١٤ جمله ایله سلامت اوزره بولنمغه و قدسیته سعی ایدڭز چونكه بو اولمقسزین هیچ بر كیمسه ربی كورمیه‌جكدر.١٥ و دقت ایدڭز اولمایه كه بر كیمسه اللهك عنایتندن محروم قاله. اولمایه كه بر آجی كوك فلیزلنه‌رك اضطراب ویره و نیچه‌لر انك واسطه‌سیله افساد اولنه١٦ اولمایه كه بر كیمسه زناكار و یاخود بر طعام بدلنه بكوریت حقنی صاتان عیسوكبی تقواسز اوله١٧ زیرا بیلورسكزكه صكره‌دن بركته وارث اولمق استدی ایسه‌ده رد اولندی چونكه كوز یاشلریله ارادی ایسه‌ده تبدیل نیته فرصت بولمادی١٨ زیرا سز طوقونیلور و آتشله یانار بر طاغه و دومانه و ظلمته و قاصرغایه١٩ و صور صداسنه و ایشیدن كیمسه‌لر آرتق كندیلره كلامڭ سویلنلمه‌مسی ایچون یالواردقلری سوزلرك صداسنه یاقلاشمادیڭز٢٠ زیرا اگر طاغه جانور بیله طوقونسه رجم اولنسون [یاخود اوقله اورلسون] دیو بیوریلان امره تحمل ایده‌مدیلر٢١ و مشاهده اولنان اولدرجه هیبتلو ایدی كه موسی غایتله قورقار و دتررم دیدی٢٢ لكن سز صهیون طاغنه و حی اللهك شهری اولان سماوی اورشلیمه و نیچه بیكلرجه ملكلره٢٣ و سماواتده قید اولنمش ایلك طوغمشلرك عظیم جماعت و كلیساسنه و جمله‌نك حاكمی اولان اللهه و كماله واصل اولمش صالحلرك روحلرینه٢٤ و عهد جدیدك میانجیسی عیسایه و هابیلك قانندن افضل شیلر سویلیان سر پمكلك قاننه یاقلاشدیڭز.٢٥ صاقنڭز سویلیانی رد ایتمیه‌سڭز زیرا انلر یر اوزرنده الهامله سویلیانی رد ایتدكلری حالده قورتلمادیلر ایسه نه قدر زیاده بز سماواتدن سویلیاندن یوز چویردیكمز حالده قورتلمایه‌جغز٢٦ كه انك صداسی او زمان زمینی صارصدی شمدی ایسه بن بر دفعه دها یالڭز زمینی دكل آنجق سمایی دخی صارصارم دیه‌رك وعد بیوردی.٢٧ و بو بر دفعه دها دیدیكی صارصلماز شیلرك باقی قالمسی ایچون یاپلمش شیلركبی صارصیلور شیلرك تبدیلینه دلالت ایدر٢٨ بو اجلدن صارصلماز بر ملكوت آلمش اوله‌رق اول عنایته نائل اوله‌لم كه انك واسطه‌سیله اللهه مقبول طرز اوزره حرمت و تقوی ایله عبادت ایده‌لم٢٩ چونكه اللهمز افنا ایدر آتشدر.