١١
١ ایمدی ایمان امید اولنان شیلرك اصلی و كورونمیان نسنه‌لرك دلیلیدر٢ زیرا قدیملر بونكله حسن شهادته مظهر اولدیلر٣ ایمانله فهم ایدرز كه اللهك كلامیله عالملر تأسیس اولندی شویله كه كورینان شیلر ظاهر اولاندن وجوده كلمدی٤ ایمانله هابیل اللهه قایینك تقدیم ایتدیكندن افضل بر قربان تقدیم ایلدی و انك واسطه‌سیله صالح ایدیكنه شهادت اولندی چونكه انك تقدمه‌لری حقنده الله شهادت ایلدی و اولمش ایكن انك واسطه‌سیله دها سویله‌یور٥ ایمانله اخنوخ اولوم كورمه‌مك اوزره نقل اولندی و الله انی نقل ایتمش اولدیغندن بولنماز ایدی زیرا نقل اولنمازدن اوّل اللهه مقبولدر دیو حقنده شهادت اولندی٦ لكن ایمان اولمادیغی حالده مقبول اولمق غیر ممكندر زیرا اللهه یاقلاشانك انك موجود ایدیكنه و كندینی طلب ایدنلره مكافات ایدیجی ایدیكنه ایمان ایتمسی كركدر٧ ایمانله نوح دها كورونمیان شیلر حقنده و حیله خبر آلمغله قورقوب كندی خانه‌سنك خلاصی ایچون بر سفینه انشا ایلدی و انك واسطه‌سیله دنیا علیهنه حكم ایلیوب ایمانه كوره اولان صلاحك وارثی اولدی٨ ابراهیم وارث اوله‌جغی محله كیتمكه دعوت اولندیغنده ایمانله اطاعت ایلدی و نره‌یه كیده‌جكنی بیلمیه‌رك چیقوب گیتدی٩ وعد اولنان دیارده غربتده كبی ایمانله مسافر اوله‌رق همان اول وعدك میراث شریكلری اولان اسحق و یعقوب ایله چادرلرده ساكن اولدی١٠ زیرا تمللو شهره منتظر ایدی كه بونڭ معماری و بانیسی اللهدر١١ ایمانله ساره كندیسی دخی حامله قالمق ایچون قوت بولدی و وعد ایدنی صادق عدّ ایلدیكندن یاشی كچمش ایكن طوغوردی١٢ بو اجلدن دخی اولمش حكمنده بولنان بر ذاتدن كثرت جهتیله كوكك یلدزلری قدر و دڭز كنارنده اولان صایلماز قوم قدر ذریت اولدی١٣ بونلرك جمله‌سی وعدلره نائل اولمامش اولوب فقط انلری اوزاقدن كوروب [اعتقاد] و ممنونیتله قبول ایده‌رك زمین اوزرنده غریب و مسافر اولدقلرینی اقرارله ایمانده وفات ایتدیلر١٤ زیرا بویله شیلری سویلیانلر بر وطن ارادقلرینی كوستررلر١٥ واقعا اگر چیقدقلری یری تذكر ایتسه‌لر ایدی عودت ایتمكه وقتلری اولور ایدی١٦ و لكن شمدی اعلاسنه یعنی سماوی‌یه راغب اولورلر بو اجلدن الله انلرك اللهی دینلمكدن حجاب ایتمز زیرا انلره بر شهر حاضرلادی١٧ ایمانله ابراهیم تجربه اولندقده اسحقی تقدیم ایلدی و وعدلری آلمش اولان١٨ سنڭ نسلك اسحقله یاد اولنه‌جقدر دیو حقنده بیورلدیغی بریجك اوغلنی تقدیم ایلدی١٩ زیرا الله انی اولولردن دخی احیا ایتمكه قادردر دیو دوشوندی و اورادن دخی انی تمثیلاً آلدی٢٠ ایمانله اسحق كله‌جك شیلر حقنده یعقوبه و عیسوده خیر دعا ایلدی٢١ ایمانله یعقوب وفات ایدر ایكن یوسفك اوغللرینك هر برینه خیر دعا ایلدی و كندی دكنكنك اوجنه طیانوب سجده ایلدی٢٢ ایمانله یوسف وفات ایدر ایكن بنی اسرائیلك خروجنی ذكر ایتدی و كندی كمیكلری حقنده وصیت ایلدی.٢٣ موسی طوغدقده والدینی چوجوغك كوزل ایدیكنی كورملریله ملِك فرمانندن قورقمایوب ایمانله اوچ آی انی صاقلادیلر٢٤ موسی كماله واصل اولدقده ایمانله فرعونك قیزینك اوغلی تسمیه اولنمقدن امتناع ایلدی٢٥ چونكه كناهك فانی صفاسنی سورمكدن ایسه اللهك قومی ایله برابر اذیت چكمكی دها ایو صایدی٢٦ و مسیحك ستمنی مصرك خزینه‌لرندن دها بیوك غنیلك عدّ ایلدی زیرا مكافاته منتظر ایدی٢٧ ایمانله ملِكك غضبندن قورقمایوب مصر دیارینی ترك ایلدی چونكه اول كورونمیان ذاتی كورور كبی ثبات ایتدی٢٨ ایمانله فصحی و قان سرپمسنی اجرا ایلدی تا كه ایلك طوغانلری هلاك ایدن انلره طوقونمایه٢٩ ایمانله بحر احمردن قره‌دن كچر كبی كچدیلر مصریلر دخی بوكا قالقشدقلرنده غرق اولدیلر٣٠ ایمانله اریحانك سورلری اطرافی یدی كون طولاشلدقدنصكره ییقلدی٣١ ایمانله فاحشه راحاب جاسوسلری سلاماً قبول ایتمش اولدیغندن ایمانسزلر ایله برابر هلاك اولمادی٣٢ و دها نه سویلیه‌یم زیرا جدعون و باراق و شمشون و یفتاح و داود و صموئیل و پیغمبرلردن بحث ایده‌جك اولور ایسه‌م بڭا وقت یتشمز٣٣ انلركه ایمان واسطه‌سیله مملكتلر فتح ایتدیلر صلاح ایشلدیلر وعدلره نائل اولدیلر آرسلانلرك آغزلرینی قپادیلر٣٤ آتشك شدتنی سوكندردیلر قلیج آغزندن قورتلدیلر ضعیفلكدن قوتلندیلر جنكده قوتلو اولدیلر اجنبیلرك اردولرینی بوزدیلر٣٥ نسوان كندی اولولرینی قیام ایتمش آلدیلر بعضلری ایسه افضل قیامته نائل اولمق اوزره نجاتی قبول ایتمیوب اشكنجه چكدیلر٣٦ بشقه‌لری استهزا و ضربلر همده بندلر و محبوسیت تجربه‌لرینه دوچار اولدیلر٣٧ طاشلاندیلر. دستره ایله بیچلدیلر. تجربه اولندیلر. قلیجله قتل اولنه‌رق اولدیلر. یوقسوللق و مضایقه و جفایه دوچار اوله‌رق قویون پوستلری و كچی دریلری كیه‌رك طولاشدیلر٣٨ (دنیا انلره لایق دكل ایدی) چوللرده و ظاغلرده و مغاره‌لرده و یرك اینلرنده آواره كزدیلر٣٩ و بونلرك جمله‌سی ایمان واسطه‌سیله حسن شهادته مالك اولدیلر ایسه‌ده وعده نائل اولمادیلر٤٠ زیرا الله بزم حقمزده افضل بر شی تدارك ایتمشدر تا كه انلر بز اولماینجه كماله واصل اولمایه‌لر