٨
١ و سویله‌دیكمز شیلرك خلاصه‌سی بودر كه سماواتده عظمت تختنك صاغنده اوتوران بویله بر كاهن اعظممز واردر٢ بو دخی مقدِسك و انسانك دكل آنجق ربك قوردیغی حقیقی مسكنك خدمتجیسی‌در٣ زیرا هر كاهن اعظم تقدمه‌لر ایله قربانلر تقدیم ایتمك ایچون نصب اولندیغندن بونڭ دخی تقدیم ایده‌جك بر شیئی اولمسی لازم گلور٤ زیرا اگر یر اوزرنده اولسیدی شریعت موجبنجه تقدمه‌لری تقدیم ایدن كاهنلر بولندقجه كاهن اولماز ایدی٥ (انلر ایسه سماده‌كی شیلرك نمونه و كولكه‌سنه كوره خدمت ایدرلر نته كیم موسایه مسكنی انشا ایده‌جكی وقت وحی اولندی زیرا اڭا باق جمله‌سنی سڭا طاغده كوستریلان رسمه كوره یاپه‌سین دیدی)٦ لكن شمدی نه قدر افضل وعدلرله ثابت قیلنمش اولان افضل بر عهدك میانجیسی اولمش ایسه اول قدر اعلا بر مأموریته نائل اولدی٧ زیرا اگر اول اوّلكیسی قصورسز اولسه ایدی ایكنجیسی ایچون محل ارایلماز ایدی٨ چونكه انلره عتابله دیر كه اشته بیت اسرائیل ایله و بیت یهودا ایله یكی بر عهد عقد ایده‌جكم كونلر گلور دیو رب بیورر٩ بو دخی انلری مصر دیارندن چیقارمق ایچون اجدادلرینك اللرندن یاپشدیغم كونده انلر ایله ایتدیكم عهد كبی اولمایه‌جقدر چونكه انلر عهدمده دوام ایتمدیلر بن دخی انلردن قطع نظر ایتدم دیو رب بیورر١٠ زیرا اول كونلردنصكره بیت اسرائیل ایله عقد ایده‌جكم عهد بودر یعنی شریعتمی ذهنلرینه قویوب قلبلری اوزرینه یازه‌جغم و بن انلره الله اوله‌جغم انلر دخی بڭا قوم اوله‌جقدر١١ و هر كس كندی قوكشوسنه و هر كس كندی قارنداشته ربی بیل دیه‌رك تعلیم ایتمیه‌جكدر زیرا كوچوك بیوك انلرك جمله‌سی بنی بیله‌جكدر.١٢ زیرا حقسزلقلرینه مرحمتلو اوله‌جغم و انلرك كناهلری ایله فسقلرینی آرتق خاطرمه كتورمیه‌جكم دیو رب بیورر١٣ یكی دیمسیله اوّلكی‌یی اسكی قیلمش و اسكی و پیر اولانك زوالی یاقیندر