٩
١ ایمدی اول اوّلكی عهدك عبادت فریضه‌لری و زمینی مقدِسی وار ایدی٢ زیرا برنجی مسكن انشا اولنوب بونده شمعدان و سفره و حضور اتمكلری بولنه‌رق بوكا قدس تسمیه اولنور٣ و ایكنجی پرده‌نك آردنده قدس الاقداس تسمیه اولنان مسكن بولنوب٤ انده آلتون بخوردان و هر طرفی آلتون قاپلو تابوت العهدوار ایدی بونده دخی منّی حاوی اولان آلتون دستی و هارونك فلیزلنمش اولان عصاسی و عهدك لوحه‌لری بولنور ایدی٥ و اوستنده كفارتكاهه كولكه ایدن جلیل كروبیلر وار ایدی بو شیلرك حقنده ایسه شمدی تفصیلاً سویله‌مك حاجت دكلدر٦ و بونلر بویله ترتیب اولنمش ایكن خدمتلرینی ایفا ایتمك اوزره كاهنلر هر زمان برنجی مسكنه كیررلر ایدی٧ فقط ایكنجیسنه سنه‌ده بركره یالڭز كاهن اعظم كیرر اما قان كوتورمیه‌رك كیرمز ایدی و اول قانی دخی كندیسی ایچون و قومك خطالری ایچون تقدیم ایدر ایدی٨ روح القدس بو وجهله بیان ایدر كه اوّلكی مسكن طوردقجه مقدِسك یولی دها اظهار اولنمامشدر٩ بو دخی او زمان ایچون بر مثال ایدی چونكه انده عبادت ایدنی ضمیرجه كماله ایردرمكه قادر اولمایان تقدمه‌لر و ذبیحه‌لر تقدیم اولنور ایدی١٠ و بونلر یالڭز ییه‌جك و ایچه‌جك و درلو درلو ییقانمه‌لر و تنه متعلق احكامه دائر اصلاح وقتی اولنجه‌یه قدر اولان آیینلردن عبارت ایدی١١ اما كله‌جك نعمتلرك كاهن اعظمی اولان مسیح ظهور ایدوب ال ایله یاپلمامش دها بیوك و دها مكمل یعنی بو خلقتدن اولمایان مسكندن كچه‌رك١٢ اركچلر و بوزاغیلر قانیله دكل آنجق كندی قانیله ابدی بر فدیه‌تدارك ایدوب مقدِسه بر كره گیردی١٣ زیرا اگر بوغالر و اركچلر قانی و اینك كولی ناپاك اولانلر اوزرینه سرپلنجه تنك پاكلكی جهتیله تقدیس ایدر ایسه١٤ ازلی روح واسطه‌سیله ذاتنی لكه‌سز اوله‌رق اللهه تقدیم ایتمش اولان مسیحك قانی ضمیر كزی حی اولان اللهه عبادت ایتمڭز ایچون اولو عمللردن نه قدر زیاده پاكلیه‌جكدر١٥ بو سببدن یكی عهدك میانجیسیدر تا كه اوّلكی عهدك حكمی آلتنده اولان تجاوزاتك فدیه‌سی ایچون اولوم وقوع بولمش اوله‌رق دعوت اولنانلر ابدی میراثك وعدینه نائل اوله‌لر١٦ زیرا وصیت بولندیغی یرده وصیت ایدنك اولومنك وقوعی لازمدر١٧ وصیت ایدن صاغ قالدقجه وصیتك حكمی اولمادیغندن وصیت اولولر اوزرینه ثابت اولور١٨ بو سببدن اوّلكیسی دخی قان اولمقسزین تقدیس اولنمادی١٩ زیرا موسی بتون قومه شریعت موجبنجه جمله امرلری سویله‌دكدن صكره بوزاغیلرك و اركچلرك قاننی آلوب صو ایله و قرمزی یپاغیله و زوفا اوتیله هم نفس كتابه همدخی جمله قومه سرپوب٢٠ بو اللهك سزه امر ایتدیكی عهدك قانیدر دیدی٢١ كذلك اول قاندن مسكنه و جمله عبادت ادواتنه سرپدی٢٢ و شریعت موجبنجه همان هر شی قان واسطه‌سیله پاكلنور و قان دوكلمینجه مغفرت اولماز٢٣ ایمدی سماواتده بولنان نسنه‌لرك نمونه‌لرینك بونلر واسطه‌سیله فقط سماوی نسنه‌لرك بونلردن افضل ذبیحه‌لرله پاكلنمسی ایجاب ایدر٢٤ زیرا مسیح ال ایله یاپلمش اولوب حقیقینك شبیهی اولان مقدِسه دكل آنجق شمدی بزم ایچون اللهك حضورینه كندینی احضار ایتمك اوزره اصل سمایه گیردی٢٥ لكن كاهن اعظمك هر سنه آخرك قانیله مقدِسه كیردیكی كبی بونڭ كندی كندینی چوق دفعه تقدیم ایتمسی ایجاب ایتمز٢٦ چونكه دنیانك تأسیسندنبرو انك چوق دفعه الم چكمسی لازم گلور ایدی. شمدی ایسه عصرلرك ختامنده كندیسی ذبیحه اولمغله كناهك دفعی ایچون بر كره ظاهر اولمشدر٢٧ و ادملره بر كره اولمك و اندنصكره حكم تقدیر اولندیغی مثللو٢٨ كذلك مسیح چوق كیمسه‌لرك كناهلرینی قالدرمق ایچون بر كره تقدیم اولنمش اولوب كندینه منتظر اولانلره خلاص ایچون كناهسز اوله‌رق ایكنجی دفعه ظهور ایده‌جكدر