٧
١ زیرا بو ملكصادق سالیم ملِكی اولوب الله متعالك كاهنی اوله‌رق ابراهیمی ملِكلرك قتلدن عودت ایدر ایكن استقبال ایدوب اڭا خیر دعا ایلدی٢ ابراهیم دخی اڭا اشیانك كافه‌سندن عشر ویردی انك اسمنك ترجمه‌سی اوّلا صداقت ملِكی و ثانیاً سلامت ملِكی معناسنده سالیم ملِكی دخی اوله‌رق٣ باباسز و اناسز و نسبسز و كونلرینك ابتداسی و عمرینك نهایتی اولمایوب آنجق ابن اللهه بكزر اوله‌رق دوام اوزره كاهن قالور.٤ و باقڭز بو نه قدر بیوك بر كیمسه ایدی كه اڭا خاندان جدی اولان ابراهیم دخی غنیمتدن عشر ویردی٥ و بنی لاویدن اوله‌رق كاهنلكی آلانلره قومدن یعنی كندی قارنداشلرندن هر نه قدر انلر ابراهیمك صلبندن گلدیلر ایسه‌ده شریعت موجبنجه عشر آلمغه تنبیه واردر٦ اما بونلرك نسلندن اولمایان كیمسه ابراهیمدن عشر آلوب وعدلره مظهر اولانه خیر دعا ایلدی٧ لكن بلا اختلاف خیر دعا بیوكدن كوچوكه اولور٨ و بوراده اوله‌جك ادملر عشر آلور اما اوراده حیاتده اولدیغنه شهادت اولنان ذات آلور٩ و عشر آلان لاوی دخی ابراهیم واسطه‌سیله عشر ویردی دینلسه جائزدر١٠ زیرا ملكصادق لاوینك پدرینی استقبال ایتدیكی زمان كندیسی دها انك صلبنده ایدی١١ ایمدی اگر لاویلو كاهنلك واسطه‌سیله كمال اولسه ایدی (چونكه بوكا مبنی خلقه شریعت دخی ویرلمش ایدی) آرتق هارون ترتیبنجه دینلمیوب ملكصادق ترتیبنجه بشقه بر كاهنك ظهور ایتمسی نه لازم ایدی١٢ چونكه كاهنلك تبدیل اولندیغی تقدیرده شریعتك تبدیلی دخی اقتضا ایدر١٣ زیرا حقنده بو شیلرك ذكر اولندیغی ذات هیچ بر كیمسه‌سینك مذبحه ملازمت ایتمه‌مش اولدیغی دیكر بر سبطدن ایدی١٤ چونكه ربمزك یهودادن نشأت ایتدیكی ظاهردر بو سبط حقنده ایسه موسی كاهنلك جهتندن بر شی سویله‌مدی١٥ و ملكصادق مشابهتجه اوله‌رق جسمانی امردن عبارت اولان شریعته كوره دكل١٦ آنجق زوال بولماز حیاتك قوتنه كوره اولان غیری بر كاهن ظهور ایتدیكی حالده دها زیاده آشكاردر١٧ زیرا سن ملكصادق ترتیبی اوزره الی الابد كاهن سین دیو شهادت ایدر١٨ زیرا شریعت هیچ بر شیئی تكمیل ایتمه‌مسیله آقدمجه اولان امر ضعیف و فائده‌سز اولدیغندن لغو اولنوب١٩ انك یرینه افضل بر امید گیردی بونڭ واسطه‌سیله اللهه یاقلاشورز.٢٠ و یمین اولمقسزین كاهنلكی اولمادیغی جهتله٢١ (چونكه انلر بلا یمین لكن بو عیسی یمینله اولوب كندینه رب سن [ملكصادق ترتیبی اوزره] الی‌الابد كاهن‌سین دیو یمین ایتدی و پشیمان اولماز دیانك طرفندن كاهن نصب اولندی)٢٢ عیسی اولقدر افضل بر عهدك كفیلی اولدی.٢٣ و انلرك باقی قالملرینه اولوم مانع اولدیغندن كاهن نصب اولنانلر چوق ایدی٢٤ بو ایسه الی‌الابد باقی اولدیغی سببدن انتقال ایتمز كاهنلكه مالكدر٢٥ بو اجلدن انك واسطه‌سیله اللهه یاقلاشانلری كاملاً خلاص ایتمكه دخی قادردر چونكه انلر ایچون شفاعت ایتمكه دائما حیاتده‌در٢٦ زیرا بو مثللو یعنی مقدّس و صوچسز و لكه‌سز و كناهكارلردن آیرلمش و كوكدن یوكسلمش٢٧ و اول كاهن اعظملر كبی اوّلا كندیسنك اندنصكره قومك كناهلری ایچون هر كون قربانلر تقدیم ایتمكه احتیاجی اولمایان كاهن اعظم بزه مقتضی ایدی زیرا كندینی تقدیم ایتمكله بونی بر دفعه‌ده اجرا ایلدی٢٨ زیرا شریعت ضعیفلكه مبتلا اولان ادملری كاهن اعظملر لكن شریعتدنصكره اولان یمین كلامی الی‌الابد مكمل اولان اوغلی نصب ایدر