٥
١ زیرا هر كاهن اعظم انسانلردن آلنه‌رق كناهلر ایچون تقدمه و ذبیحه‌لر تقدیم ایتمك اوزره اللهه متعلق اموره انسانلر ایچون تعیین اولنور٢ و جهالت و ضلالتده اولانلره شفقتلو اولمغه قادر اولور چونكه كندیسی دخی ضعیفلكله احاطه اولنمشدر٣ و بو سببدن قوم ایچون ایتدیكی كبی كندیسی ایچون دخی كناهلردن طولایی قربان تقدیم ایتمسی واجبدر٤ و بو شرفی بر كیمسه كندیلكندن آلماز آنجق الله طرفندن هارون كبی دعوت اولنان ذات آلور٥ كذلك مسیح دخی كاهن اعظم اولمق عزتنی كندی كندینه آلمادی آنجق سن اوغلم‌سین بن سنی بو كون تولید ایلدم دیان اڭا عزت ویردی٦ نته كیم بشقه بر یرده دخی سن ملكصادق ترتیبی اوزره الی الابد كاهن سین دیو بیورر٧ او دخی جسدده بولندیغی زمان كندینی اولومدن خلاص ایتمكه قادر اولانه عظیم فریاد و كوز یاشلریله نیاز و رجالر عرض ایدوب تقواسی سببندن مستجاب اولدی٨ و هر نه قدر اوغل بولندی ایسه‌ده چكدیكی الملردن اطاعت اوكرندی٩ و كماله واصل اولمسیله كندینه اطاعت ایدنلرك جمله‌سی ایچون ابدی خلاصه سبب اولدی١٠ و الله طرفندن ملكصادق ترتیبی اوزره كاهن اعظم تسمیه اولندی١١ بونڭ حقنده دخی سویلیه‌جك چوق سوزمز وار ایسه‌ده قولاقلرڭز آغرلاشمش اولدیغندن تفسیری مشكلدر١٢ زیرا وقته نظراً معلم اولمڭز لازم ایكن بر كیمسه‌نك سزه اللهك كلاملرینك اركاننك ابتداسی نه اولدیغنی تكرار تعلیم ایتمسنه محتاجسڭز و قوتلو طعامه دكل آنجق سوده محتاج اولانلر اولدیڭز١٣ زیرا سودله بسلنان هر كیمسه صلاح كلامی حقنده بیخبردر زیرا چوجوقدر١٤ اما قوتلو طعام حاسه‌لری عادت سببندن ایویی و كوتویی تمیز ایتمكه تعلیم اولنمش اولان كامللره مخصوصدر