٤
١ ایمدی قورقه‌لم اولمایه كه انك راحتنه كیرمكه وعد باقی قالمش ایكن سزدن بری محروم قالمش بولنه٢ زیرا انلره تبشیر اولندیغی كبی بشارت بزه دخی تبشیر اولندی لكن ایشیتدكلری كلام ایشیدنلرده ایمانله امتزاج ایتمدیكندن انلره فائده ایتمدی٣ زیرا بز كه ایمان ایتمش ایز راحته كیررز نته كیم راحتمه كیرمیه‌جكلردر دیه‌رك غضبمده یمین ایتدم دیو بیورمشدر. واقعا دنیا قوریله‌لیدنبرو ایشلر ختام بولمش ایدی٤ زیرا بر یرده یدنجی كون حقنده بویله سویله‌دی یعنی و یدنجی كونده الله كندینك جمله ایشلرندن استراحت ایتدی٥ و تكرار بوراده راحتمه كیرمیه‌جكلردر دیر٦ ایمدی بعضلرك اڭا كیرملری مثبت بر امر اولوب مقدّما كندیلرینه بشارت تبشیر اولنانلر ایمانسزلقدن طولایی كیرمدكلری اجلدن٧ تكرار بر كون تعیین ایدوب بو قدر وقتدنصكره داود واسطه‌سیله بو كون دیور نته كیم اگر بو كون انك صداسنی ایشیدر ایسه‌ڭز قلبلركزی قاتیلاشدرمایڭز دینلمشدر٨ زیرا اگر یشوع انلری راحته یتشدرمش اولسه ایدی بوندنصكره بشقه بر كون حقنده سویله‌مز ایدی٩ اویله ایسه اللهك قومی ایچون بر راحت باقیدر١٠ زیرا الله كندی ایشلرندن استراحت ایلدیكی كبی انك راحتنه كیرن دخی كندی ایشلرندن استراحت ایتمشدر١١ ایمدی اول راحته كیرمكه جهد ایده‌لم اولمایه‌كه بر كیمسه همان اول ایمانسزلغك نمونه‌سی اوزره دوشه١٢ زیرا اللهك كلامی حی و مؤثردر و هر ایكی آغزلو قلیجدن كسكیندر و جان ایله روح و او یناقلر ایله ایلیكك تقسیمنه قدر نافذدر و قلبك افكار و نیتلرینی تمییز ایدر١٣ و انك حضورنده ظاهر اولمایان بر مخلوق یوقدر فقط هر شی بزم حساب ویره‌جكمز ذاتك نظرنده عریان و آچیقدر١٤ ایمدی بزم سماواته كچمش بیوك كاهن اعظممز ابن الله عیسی وار ایكن اقراری قوی طوته‌لم١٥ زیرا كاهن اعظممز ضعیفلكلرمزه همدرد اولمغه غیر مقتدر دكلدر آنجق كناهدن بری اولوب هر خصوصده بزم كبی تجربه اولنمشدر١٦ بوكا بناءً مرحمته نائل اولمق و لازم اولان امداد ایچون عنایت بولمق اوزره عنایتك تختنه جسارتله یاقلاشه‌لم