٢
١ بو سببدن ایشیتدیكمز شیلری هیچ بر وجهله قاچورمامق ایون انلره دها زیاده دقت ایتملی ایز٢ زیرا اگر ملكلر واسطه‌سیله سویلنیلان كلام ثابت اولوب هر بر تجاوز و اطاعتسزلق لایق اولان جزاسنی بولدی ایسه٣ ابتدا ربك واسطه‌سیله بیوریلوب ایشیدنلر طرفندن بزه تصدیق اولنه‌رق٤ الله دخی كندی ارادتنه كوره علامتلر و معجزه‌لر و درلو درلو قوتلر و روح القدسك موهبه‌لریله شهادت ایلدیكی بویله عظیم خلاصی اهمال ایتدیكمز تقدیرده بز نصل قورتیله‌جغز.٥ زیرا حقنده سویله‌دیكمز شول كله‌جك عالمی ملكلر حكمی آلتنه قومادی٦ اما بر ذات بر یرده شهادت ایدوب انسان نه در كه انی ذكر ایده‌سین یاخود انسان اوغلی نه در كه انی زیارت ایده‌سین.٧ انی ملكلردن بر از اشاغی قودك انی جلال و عزتله تاجلاندردك و انی سنڭ اللركك ایشلری اوزرینه نصب ایتدك٨ جمله موجوداتی انك ایاقلری آلتنه قودك دیدی چونكه جمله موجوداتی انك حكمی آلتنه قومسیله حكمی آلتنه قونلمامش بر شی براقمادی. شمدی ایسه دها جمله موجوداتی انك حكمی آلتنده كورمیورز٩ لكن ملكلردن براز اشاغی قیلنمش عیسایی اللهك عنایتیله جمله ایچون اولوم طاتمق اوزره اولوم المی سببندن جلال و عزتله تاجلانمش كوریورز١٠ زیرا هر شی كندی ایچون و هر شی كندی الیله اولانه چوق اوغللر جلاله كتوردیكنده انلرك خلاصنك رئیسنی الملر واسطه‌سیله كماله اردرمك لایق ایدی١١ زیرا كرك تقدیس ایدن كرك تقدیس اولنانلرك جمله‌سی بر ذاتدندر بو سببدن انلره برادر دیمكه حجاب ایتمیوب دیركه١٢ سنڭ اسمكی برادرلرمه بیان ایلیه‌جكم. كلیسانك اورتاسنده سڭا تسبیح ایده‌جكم١٣ و ینه بن اڭا توكل ایده‌جكم و ینه اشته بن و اللهك بڭا ویردیكی اولاد١٤ ایمدی اولاد تندن و قاندن مشترك بولندقلرندن كندیسی دخی بعینه همان بو شیلره حصه‌دار اولدی تا كه اولوم واسطه‌سیله اولومك قوتنه مالك اولانی یعنی شیطانی ابطال ایدوب١٥ بتون عمرلرنده اولوم قورقوسی سببیله قوللغه مبتلا اولانلری آزاد ایده١٦ زیرا ملكلره اصلا دستكیر اولماز آنجق ابراهیم نسلنه دستكیر اولور١٧ بو اجلدن قومك كناهلرینه كفارت ایتمك ایچون اللهه متعلق شیلرده كندیسی رحیم و صادق كاهن اعظم اولمق اوزره هر شیده برادرلرینه بكرز اولمق لازم گلدی١٨ زیرا كندیسی تجربه‌یه دوچار اوله‌رق الم چكمش اولدیغندن تجربه چكمكده اولانلره یاردم ایتمكه قادردر.